I Sipeng
Di Désa Kerta, ada anak madan I Sipeng. Ia lekad dugas nyepiné. Mémé bapané dugasé ento paling gati krana tusing dadi pesu. Anaké wikan nganikaang, catur brata panyepian, ada madan amati lalungaan, tusing dadi pesu, tusing dadi kija-kija.
Yén pesu, bisa dandanina, pacalangé lakar ngaba ka désa. Sinah lakar kena dedosan. Baan palingné, aliha kelihan banjarné, nyambatang kawéntenan iané lantas kelihan banjarné ngatehang ka rumah sakit. Neked di rumah sakit tusing makelo lantas lekad panakné. Bagia reramané, sentanané tusing nyakitin méméné. Aluh reramané ngaénang adan, I Sipeng apang ada inget-ingetan.
Lanus idupné I Sipeng, sayan makelo sayan ngelihang. Reramané masi demen, pisagané masi demen. Ia anak cerik jemet mlajah. Apabuin di banjarné ada reramon gamel-gamelan. Sabilang mamunyi gongé, alah girikin batisné apang ka banjar ja. Reramané masi kendel krana sentanané demen mlajahang déwékné.
“Ené melahné I Sipeng, ia lekad dugas nyepiné, jani demen tekén gamelan ané ramé,” kéto panguruk gamelané mamunyi. “Buina énggal pesan nawang gending.”
I Sipeng dadi juru ugal. Pangus pesan ngebug gangsa lan muané santep. Timpal-timpalné masi demen krana I Sipeng nyak ngorahin timpalné nuju tusing bisa. Sabilang ia teka ka banjar lega sawitrané makejang. Di kénkéné kanti sanja mara mulih. Reramané demen ningalin I Sipeng bisa magambel. Pangurukné nyambatang, “Magambel ento dadi anggon ngayah di pura. Anggoan ngayah di désa-désa.”
Sayan makelo, sayan liu anaké nawang kabisané I Sipeng. Sekeha gambelné liu ané ngupah. Mirib mataksu sasukat I Sipeng marengin masekeha, liu ané ngupah. Ipidan makelo gongé tusing ada nepakin. Jani, sayan pepes madingehan munyin gamelanné.
Ajak liu adana, ada dogén ané tusing demen. I Sipeng jani suba ada petang wuku tusing nyidaang magambel. Awakné kebus ngrantab sabilang nuju sandikala misi nguyang, tusing nyidaang nahanang kebus awakné. Reramané suba mautsaha ngalihang balian. Sabilang balian ané ngubadin, orahanga I Sipeng ento anak melik, koné patut bayuhin. Lekadne koné ané ngranayang. Lekad dugas nyepiné.
Béh, paling masi reramané munduhang prabia apang nyidaang mayuhin sentanané. Nyilih di pisagané apang nyidaang mayuhin. Welas asih pisagané, baanga nyilih pipisné, sakéwala misi masi panakné. Bayuhina I Sipeng di umah baliané. Mara bacana adané, I Sipeng, alis baliané menék, “Ené adané tusing cocok, antesné ganti adané, suud madan I Sipeng, mirib baan lekad dugas nyepiné ené?”
“Yukti patut. Ipun lekad daweg nyepiné.”
“Uli jani ganti adané.”
“Sira wastané mangkin?”
Baliané ngurak-ngurikang tujuhné di telapakan limané, “I Sunia adanin. Kaukin ia, I Gedé Sunia. Ené panak pinih kelih?”
“Inggih.”
Sayan makelo, sayan ada cihnané. Sasukat I Sipeng maganti adan dadi I Sunia, kapah jani gelemné buka ipidan pesu. Sayan ngelihang, sayan ngliunang ia ngelah timpal lan sayan liu nawang gending, sayan lega masi timpal-timpalné. 7
Komentar