The Broken Rose

Uli sasukat jatuh cinta ngajak adik kelasé ané jegég ento, bli setata ngalih pelarian. Bli setata mautsaha apang bli ngidang tegar menghadapi kenyataan. Sakéwala yéning indayang satwané jatuh cinta ené tuah sakadi bunga mawa ané benyah di kenehé. Benyah keneh bliné ulian cinta di keneh bliné sing sida katekedang. Jani sarat bli nuturin I Luh, keneh bliné luh apang nawang saking sujati paundukan bliné ané jani. Ulian cinta ané sing sida baan bli naanang ipidan ento makada bli jani déprési. 

Minab penyakit bliné suba déprési kronis. Sakéwala Ida Sang Hyang Widhi enu swéca tekén bli. Bli nyidayang ngalih ubad dyastun sujatiné sing sida baan nyambatang cintané ané tumbuh ipidan tusing ja lakar ilang. Cinta ané tumbuh dugas bli SMA minab tetep lakar dadi satwa ané sakit di kenehé. Nanging beli suba lascarya tekén paundukané ené. Uli sasukat perpisahan, galahé terus majalan bli ngengsapang paundukan bliné ané jatuh cinta. Pajalan galahé ngajahin bli paplajahan apang sida bli mengikhlaskan kisah cinta né ento. Nanging sakit di keneh bliné minabang rasa sing sida lakar ngengsapang. 

Jani ada lantas iluh ajak bli matunangan. Yéning dadi bli ngidih tekén I Luh tresnain pajalan idup bliné apang madasar baan tresna suci. Miribang di keneh bliné rasa ada bunga mawa ané benyah ipidan, benyah sangkaning kaliwat sakit ati. Sakéwala jani sinah ada I Luh sida lakar ngubadin déwék bliné. Ubadin pajalan tresnan bli ané matatu ipidan. Apang da kanti tatun di kenehé masisa. Bli percaya tekén I Luh. Beli percaya I Luh ngelah keneh satya bhakti ané mautama sida lakar nyatyain déwék bliné kayang kawekasan. Tuah tresna I Luhé ané sarat ati ati bli. Bli sarat nunas paica di kemulan apang kawitané nyuryanin nyaksinin pajalan tresnan bli ngajak I Luh.

Nanging Luh apang nawang tresna ané jalanin jani boya ja sangkaning tresna pelarian. Tresna kadasarin baan keneh suci, keneh sujati aé lakar bekelang masakapan. Ento kranané tulungin bli Luh. Olasin déwék bliné madasar baan tresnan I Luhé. Tulungin bli apang sida ngubadin keneh bli ané matatu ipidan. Dumadak I Luh nampi pangidih bliné madasar baan keneh tulus tur suci. Tresnan I Luhé satmaka cihna bukti satya sujati tresna ngajak bli. Lakar ajak I Luh masakapan. Sinah disubané masakapan satwa bunga mawa ané benyah ento sing lakar masisa buin di keneh bliné. Nanging keneh bliné rikala ento lakar galang nampi guminé galang natah ulian sida Luh ajak bli masakapan. Ento awanané bli ngidih tekén I Luh tampi jani pajalan tresnan bliné madasar baan keneh I Luhé ané sujati. 

Luh Sandat prajani ngetélang yéh paningalan ri kala katuturin baan Nyoman Lara. Disubané kéto, ditu lantas ia nampi pangidihné Nyoman Lara. Nah bli, ané jani tiang lakar majanji nyatyain bli Nyoman madasar baan keneh sujati, sakéwala minabang yéning buka déwék tiangé, sujatiné tiang tuah ja Luh Sandat, minabang bli sida lakar nampi déwék tiangé buka bungan sandaté. Nah amonto pangidih tiangé ngajak bli Nyoman Lara. Nah, yéning mula tuah kéto pangidih adiné, sujatiné bli sida nampi unduké ento, apang ja ada masi ané ngolasin déwék bliné, rikalaning bunga mawa di keneh bliné suba benyah, jani ada lantas bungan sandat, ento sujatiné pajalan satwa kalintang mautama. Sakéwala ané kenehang bli, kénkén sujatiné artin adiné ngorahang adi mula tuah sakadi bungan sandaté, ento ané kondén sida baan bli ngartiang. Yéning sida tampi bli sujatiné adi mula madan Luh Sandat, sakéwala kénkén kasuksmané yéning adi ngorahang ibusan mula buka bungan sandaté? Ento sinah lakar kenehang bli malu. 

Nah yéning kéto pangidih bliné mula ja tuah bli ané lakar sida ngartiang déwék tiangé buka bungan sandaté, sakéwala melahang nyaan bli nampi yéning sida bli nepukin artiné. Bli percaya tekén tiang, sinah buka munyin adiné, bli nampi adi mula tuah madan Luh Sandat. Nah yéning kéto amonto suba sujatiné isin keneh tiangé. Nanging, buka bungan sandaté, tiang boya ja sakadi bunga mawa ané layu di keneh bliné. Apabuin nyaan lakar dadi bunga mawa ané benyah di keneh bliné, sing ja ada tiang buka kéto. Yéning tuah mula kéto pangidih adiné, bli sujatiné kalintang ngaturang suksma tekén adi, adi suba nyatyain pangidih bliné. Sakéwala ané idih bli, apang ja saja buka munyin adiné. 

Nah amonto pajalan satwan bliné ané sida tekedang bli tekén adi. Sakéwala pangidih bliné, buka munyin adiné ibusan adi ngorahang tuah sakadi bungan sandaté déwék adiné. Sinah ento kalintang mautama kasuksmané, salayu layu né ia anak sida ngamiikang kulawarga. Ento anak istri sané kalintang mautama. Apang tusing buka satwan bliné dadi mawa ané benyah utawi ring basa Inggris kasengguhang the broken rose. 7