Mister Toris

Ngrastitiang jagaté apang sayan melah, sayan landuh, sayan degdeg buina tusing ada anak miyegan utawi matungkas ané tusing patut tungkasang. Ia ngaku demen di Bali lakar mlajah parindikan budaya Bali. Ia meled mlajahin rontar usadha. Rontar ané misi sakancan ubad. Utamané Taru Pramana. Buina sedeng melaha, reraman tiangé nyalanang pangusadhén. Balian ané manut di usadha.  Sakancan adan ubad tawanga, buina kruna ané soléh-soléh tawanga, upami rangda nyerit, ento kayu tingulun, balu mentas, bluntas, taru sakti, punyan dapdap. Ento ngranayang sayan kasub masi banjar tiangé ulian ada balian. 

Ajak tiang Mister Toris ka umah reraman tiangé, ané dadi pangusadhén. Ia demen krana uli mara macelep suba maciri umah balian. Di arep angkul-angkulné ada kayu tulak, ada punyan sulasih. Kenyem Mister Toris. Ia ngorahang lakar mlajah dadi balian ngusadhén. Sabilang dina Saniscara, ia ka banjar tiangé. Yén sadinan-dinané, ia ngaku nongos di Ubud, apang tis koné. Buina liu timpalné ané lénan ada di Ubud, ada masi di Sukawati lakar mlajahin budaya Bali ané lénan, mlajahin igel-igelan, ada mlajahin ngigel rangda, ada mlajahin topéng sidhakarya, ada mlajahin telék, ada masi mlajahin majejahitan. Manian yén suba makejang bakat plajahina apang aluhan koné buin bedik. Dadi budaya Baliné sayan kaloktah di duranagara.

Peteng lemah Mister Toris mlajahin usadha. Toris gumanti demen mamaca apabuin ada ané aliha. Sabilang ané tusing kakeneh, cucud ia matakon dikénkéné leleh ngenah reraman tiangé nyautin. Ia mlajahin sakancan boréh, boréh anget, boréh tis lan boréh dumelada. Manian boréhé ento lakar dadianga lulur, ditu melahanga kulitné isinina gambar lan gunané sinah pipis lakar bakatanga, bisa-bisa iraga lakar meli. Suud mlajahin boréh, ia mlajahin sarwa loloh, magenapan loloh tawanga, loloh don basé, loloh don sembung, loloh kunyit, kanti loloh samiroto ané pait. Manian lakar dadianga jamu koné lakar awétanga apang makelo maguna. Demen gati sebengné Mister Toris, mlali maan ka Bali mlajah maan.

Ajak tiang, ia ka bukit ané paak umah tiangé. Ia makesiab mara nepukin bukité langah misi tatajukan. Ento lantas tagih belina. Sambatang tiang, toris tusing dadi meli tanah. Ia nagih ngontrak. Tekedang tiang tekén panyamaan tiangé. Makejang sumakuta ngontrakang. Pipisné dadi anggon prabia mayadnya. Kendel gati Mister Toris mara maan ngontrak bukit. Buina gumanti melah uli bukité ningalin pambiaran ané si betén utawi ané sawat, bukit joh melah ngenahné, punyan-punyan kayuné renes ngenah, yadiastun yén paakin tusing sanget buka kéto. Adana dogén bukit johin, makejang ngenah melah.

Ia ngajak timpal-timpal matajukan di bukité. Tiang masi bareng. Sakancan temu-temu tajukina, sakancan ané dadi loloh tajukina ditu. Sakancan punyan ané dadi anggon ubad tajukina. Ané demenina tajukina masi punyan kélor. Sambatanga keloré ento maguna gati. Di duranagara koné mael argan kéloré lakar dadianga téh utawi lakar opena koné apang dadi anggon makelo. Ada masi bunga sandat tajuka lakar dadianga lengis. “Sajan jelema ririh. Melah dadi bukité jani ada pikenohne,” tiang ngrieng padidian. Gaénanga balé bengong, gaénanga masi tongos sirep torisé ané meled nginep ditu. Sabilang timpalné kemo ngorahang demen. Mabalih bukit maan, maboréh Bali maan. Jamu Bali masi maan. Suud ngajeng torisé baanga kolek nangka, koné anggon makanan panutup.

Tiang bengong mabalih kaduégané Mister Toris. Dueg madagang, dueg ngalih timpal. Kaweruhan ané ada di Bali nyidaang sekalaanga dadi pipis. Tiang nagih maburuh ditu. Mister Toris gumanti melah kenehné. Ia nerima tiang dadi tukang tajuk sarwa temu. Bisa masi tiang mablekis abedik. Tanah tiangé buruhin tiang sajan jelema gumanti belog pesan tiang niki. Makelo-kelo cacep masi tiang mamula temu-temu. Tawang tiang pikenoh temuné. Mister Toris kenyem-kenyem mabalih tiang. “Reraman Gedéné ngorahin apang bisa matajukan temu-temu lan ané lénan. To kéloré suba makirim ka Amerika lan Eropa. Ipidan kadén dadi sesonggan, majukut di natah. Jani, tusing di natah umah dogén patut tajuk. Makejang dadi melah, yén suba tajukin buka jani.” Tiang tawanga bengong mabalih kemikan Mister Toris. Ia masi nyambatang lakar najukin tiing di réjéng bukité apang tusing embid bukité. Ada masi kenehné yén suba melah entikan tiingé lakar dadianga grantang, dadianga angklung lakar abana ka Bélgia. Manian yén ada mati ditu dadi anggon ngater kalané mabénang. Tiang tusing neked kemo kenehé.

Kaukina tiang ajakina ka ambéné. Ia nyambatang lakar ka Bélgia buin mani. Tiang orahina nongosin bukité lan ngawasin apang tetep melah. Tiang manggutan. Ia tusing nyak atehang ka bandara, ngorahang timpalné masi lakar bareng ka Bélgia ané mlajah ngigel lan mlajah magamel.

Ada suba awuku Mister Toris di Bélgia, ia ngirimin tiang vidéo sedek timpalné ngurukang magambel. Ada masi vidéo timpalné ngurukang ngigel. Ané siduri vidéo Mister Toris ngusadhén timpalné di Bélgia. Ping dua, ping telu tiang mabalih vidéoné. Vidéoang tiang masi tajukan ané ada di bukité. Kendel gati mara ningalin tajukané melah seger lan liu sandatné mabunga. Ia masi nyambatang lakar énggal ka Bali. Ia lakar ngalih bukit ané lénan lakar tajukina sarwa ubad-ubadan. Tiang mablengek mara ia nyambat buka kéto. Sinah sayan liu bukité lakar kontrak toris?

Petengé nekain, tumbén tiang kiap pesan buka kena sesirep. Apa tiang liunan makeneh ngranayang. Buina maan ngilehin bukit ada ping telu, nuréksain tajukan ané antes ganti. Ngipi ané tuara-tuara, milehan ajaka tekén ipianné. Sagét dingeh tiang anak ramé di sisi, sedut-sedut, sagét apiné suba murub. Tiang jerit-jerit, tusing ada ané nyagjagin. Tajukanné Mister Toris makejang dilah api. Ada layu, ada suba dadi abu. Mara bukak hp-én tiangé, sagét Mister Toris ngorahin nyemput di bandara. 7